ಕರದಿ ಸ್ಫುರಿಸಿದ ಪ್ರೇಮದಮೃತವು
ಹರಿಯಿತೊಲವಿನ ಹೊಳೆಯೊಲು
ಚರಮ ಸೀಮೆಯ ಅಮರ ಪ್ರೇಮವು
ಬೆರೆಯಿತೀ ತನುಮನದೊಳು
ಬೆಸೆದ ಬೆರಳೊಳು ಬಸಿವ ಪ್ರೀತಿಯು
ಹೊಸಗನಸಿಗಿದು ಆಸರೆ
ಹೊಸೆದ ಕೈಗಳು ಹುಸಿಯ ನುಡಿಯವು
ಹಸಿದೆನಗೆ ನೀ ಕೈಸೆರೆ
ವಿರಹ ತಾಪದಿ ಒಲವ ದೀಪಕೆ
ಎಣ್ಣೆ- ಕೈಯೊಳಗಿನ ಪಸೆ
ಸಾಂದ್ರ ಪ್ರೀತಿಗೆ ಸಾಕ್ಷಿ ನೀಡಿವೆ
ಬೆಸೆದ ಕೈಗಳ ಭರವಸೆ…!
ಬಾಹುಬಂಧನ, ಭಾವಬಂಧನ
ಹಸ್ತ ಹಸ್ತದ ಚುಂಬನ…
ಕೈಯ ಬೆಸೆದರೆ ಮೈಯ ತುಂಬಿತು
ಒಲವ ರಸ ರೋಮಾಂಚನ!
ತುಟಿಯ ಜೇನ್ಝರಿ ಬತ್ತಿ ತನುಸಿರಿ
ಸೊರಗಿ, ಮೈ ಸುಕ್ಕಾಗಲಿ
ಒಲವ ವಾಗ್ಝರಿ ಪ್ರೇಮದಾ ಸಿರಿ
ಎಂದಿಗೂ ಸ್ಫುಟವಾಗಲಿ
ಕವನತನಯ