ಅವಳ ಕದಪುಗಳಲ್ಲಿ ಹೊಸ ಕೆಂಡಸಂಪಿಗೆ…
ಅವಳು ನಾಚುತ್ತಲಿರೆ ಅವು ಕೆಂಪಕೆಂಪಗೆ….
ಸೋತು ಹೋಗುವ ಭಯವು ನನ್ನವಳ
ಕಂಪಿಗೆ…
ಮೈಮರೆತು ಬಿಡುವಾಸೆ ಅವಳುಸಿರ ಇಂಪಿಗೆ….
. . . . . . . . . ಸಖ್ಯಮೇಧ
ಬದಲಾವಣೆ
ಹೊಸತನ….!!
ಹಂಬಲವೂ ಕಂಬನಿಯೂ ದೂರಾಯ್ತು; ಸಂತಸದ-
ಹಂದರವು, ಸುಂದರವು ಮನವು ಈಗ…!
ಬದಲಾದೆ, ಮೊದಲಾದೆ, ಕೆಂಡಸಂಪಿಗೆ ಕೇಳೆ-
ಹೊಸಕಂಪು ಬಾಳಲ್ಲಿ ಸೂಸುತಿಹುದು..!!
.
ಚಂದವಿದೆ ಹೊಸ ಬಾಳು, ಪರಿಶುಭ್ರ ಬಾನಂತೆ
ಹೊಸಚುಕ್ಕಿ ಎರಡೆರಡು ಹೊಳೆಯುತಿಹುದು…
ಸ್ವಚ್ಛಂದ ಮನಸು, ಸ್ವಚ್ಛಂದ ದಾರಿ
ಬದುಕೀಗ ನಿರಾಳ
ನನ್ನೊಲವಿನೊಡನೆ…!
.
. . . . . . . . ಸಖ್ಯಮೇಧ
ಅವಸರ
ಅವಸರಿಸಿ, ಕಾತರಿಸಿ ಕಾದಿರುವೆ ಸಮರಸಕೆ
ಸರಸರನೆ ವಿರಹವನು ದೂರ ಮಾಡು…
ಮುನ್ನುಡಿಯೇ ಇಲ್ಲದೆಯೇ ಹುಟ್ಟಿಹುದು ಪ್ರೀತಿ…
ನಿನ್ನ ಸನಿಹವು ನನಗೆ ಆಪ್ಯಾಯಮಾನ…
ಕೆಂಡಸಂಪಿಗೆ ….
. . . . . . . ಸಖ್ಯಮೇಧ
ಒಲವು
ನಿನ್ನೊಲವಿನ ತೆವಲು ಕವಲೊಡೆದಿದೆ
ತನುವಲಿ….
ಸಲಹಿರುವೆ ಹಲವಾರು ಮಹಲುಗಳ ಮನದಲಿ…
ಉಯಿಲಾಗಿದೆ ನನ್ನ ತನ ನಿನ್ನಯ ಹೆಸರಲಿ…
ಗೆಲುವಾಗು ಬಲವಾಗು , ಜೊತೆ ಬಂದು ಬಾಳಲಿ….
ಕೆಂಡಸಂಪಿಗೆ…
ಸಂಕ್ರಾಂತಿ
ನೋಡು ಗೆಳತೀ …
ಸಂಕ್ರಮಣ ಬಂತೆಂದು
ಸೂರ್ಯನೂ ಗತಿ ಬದಲಿಸಿದ್ದಾನೆ…
.
ಹತ್ತು ಸಂಕ್ರಮಣ ಕಳೆದರೂ
ಎಗ್ಗಿಲ್ಲದೆ, ಬಾಗದೇ
ನಡೆದಿದೆ ಒಲವು…
.
ಈ ಪ್ರೀತಿ ನಿರಂತರ
ಕಣ್ಣು
ಗೆಳತೀ…,
ಆಕಾಶದಲ್ಲಿ
ನಕ್ಷತ್ರಗಳೆಷ್ಟಿವೆಯೋ
ಗೊತ್ತಿಲ್ಲ…
ಆದರೆ…
ಎಷ್ಟಿರಬೇಕಿತ್ತೋ
ಅದಕ್ಕಿಂತ ಎರಡು ಕಮ್ಮಿಯಿದೆ…
ಮತ್ತು…
ಆ ಎರಡೂ ನಿನ್ನ
ಕಂಗಳಲ್ಲಿವೆ….!!
. . . . . . ಸಖ್ಯಮೇಧ
ಆಕೆ
ಬಿಂಕದಲಿ ನಿಂತಿತ್ತು ಆ ಕೆಂಡಸಂಪಿಗೆ
ಅದ ಕಂಡು ಮನದಲ್ಲಿ ನೆನಪುಗಳ ಮೆರವಣಿಗೆ…
ಹೂವಲ್ಲೂ, ಘಮದಲ್ಲೂ ಅವಳದ್ದೇ ನೆನಪು…
ಹೂವಲ್ಲೂ ಅವಳ ಮೊಗ ಅರಳುವುದೇ ಒನಪು…
.
ಗೆಳತೀ…
ಕತ್ತಲೆಯು ಏರುತಿರೆ
ನಿನ್ನ ನಗೆಯಾ ಹೂವು
ಅರಳುತಿರೆ- ನನಗಾಗ
ಮತ್ತೆ ಮುಂಜಾವು…!
. . . . . . ಸಖ್ಯಮೇಧ
ಸಂಕಲನ
ಗೆಳತೀ …
ನನ್ನ
ಅಚ್ಚುಮೆಚ್ಚಿನ
ಕವನ ಸಂಕಲನ
ಬಿಡುಗಡೆಯಾದದ್ದು
ನೀ ಹುಟ್ಟಿದ
ದಿನದಂದೇ…..!
. . . . . ಸಖ್ಯಮೇಧ
ನೀರಾಜನ
ಗೆಳತೀ …
ಕೊಳವೆಂಬ ತಟ್ಟೆಯಲ್ಲಿ
ಚಂದ್ರನೆಂಬ ಕರ್ಪೂರ….
.
ನಮ್ಮ ಪ್ರೀತಿಗೆ ಶುಭಕೋರುವ
ಮಂಗಳ ನೀರಾಜನ…!
. . . . . ಸಖ್ಯಮೇಧ
ಹೂರಾಣಿ
ಹೂಗಳ ಸಂತೆಯಲ್ಲಿ …
ಮಲ್ಲಿಗೆಯ ಪರಿಮಳಕೆ ಎಲ್ಲರಿಗೂ ಉನ್ಮಾದ…
ಕೇದಿಗೆಯು ಬಂದಾಗ ಜೊತೆಗೆ ಉದ್ವೇಗ..!
ಜಾಜಿಯದೂ ಸೋಜಿಗ..! ಸರಿಸಾಟಿ ಯಾರೀಗ..?! –
ಕೆಂಡಸಂಪಿಗೆ ಬಂದಾಗ – ಬದಿಗೆ
ಸರಿದವು ಬೇಗ…!
.
ತನ್ನ ಕಂಪಿನ ಗಾಢತೆಗೆ
ಅಮಲೇರಿದಂತಾಗಿ
ಇನ್ನಷ್ಟು ಕೆಂಪೇರಿ-
-ದಳು ಕೆಂಡಸಂಪೀ….
. . . . . . . ಸಖ್ಯಮೇಧ