ಕೆಂಡಸಂಪಿಗೆ

ಕೈಬಳೆಯ ಮೇಲಿರುವ
ಆ ಸಾಲು ಚುಕ್ಕಿಗಳು
ರಾತ್ರಿ ಕಾನನದಲ್ಲಿ
ಮಿಂಚುಹುಳ ನಕ್ಕಂತೆ,..

ಕೈಯಲ್ಲಿ ಕಳೆದುಂಬಿ
ಕಾಣುತಿದೆ ಮದರಂಗಿ
ಚದುರಂಗವಾಡೋಣ
ಕೈ ಮೇಲೆ ಮುದ್ದಾಗಿ…

‪#‎ಕೆಂಡಸಂಪಿಗೆ‬

. . . . . . . ಸಖ್ಯಮೇಧ

ಸಾಲು ಶ್ರೇಣಿಯ ರಜತ ಪರ್ವತ-
ದಂತೆ ಕಂಡಿದೆ ದಂತ ಪಂಕ್ತಿಯು
ಕಿವಿಯ ಲೋಲಕ ಬಹಳ ಮೋಹಕ
ಮನದಿ ಹೊಮ್ಮಿದೆ ಭಾವ ಸೂಕ್ತಿಯು….

‪ಕೆಂಡಸಂಪಿಗೆ‬ ನಕ್ಕ ವೇಳೆಗೆ
ಮಿಕ್ಕ ಹೂಗಳು ಪಕ್ಕ ಸರಿದವು
ಚಿಕ್ಕ ಹೃದಯದಿ ಪುಕ್ಕ ಪಡೆಯಿತು
ಪ್ರೇಮಹಕ್ಕಿಯು ನಕ್ಕು ನಲಿಯಿತು…
#ಕೆಂಡಸಂಪಿಗೆ

ಮೃದುವಾದ ಕಿವಿಯೆಂಬ
ಅಂದದಾ ಬಾವಿಯೊಳು
ಬೀಳಬೇಕೆನ್ನುತಿದೆ
ಎದೆಯ ಉಸಿರು ….

ಚಂದದಾ ಕೈ ನೆನೆದು
ಕೆನ್ನೆ ಕೆಂಪಾಗಿದೆ…
ಕೈತುತ್ತು ತಿನುವಾಸೆ
ಹಸಿವು ಹೆಚ್ಚಾಗಿದೆ…

‘ಮುತ್ತಿನ’ ಹಾರವನು
ತೊಡಿಸಲೇ ಕೊರಳಿಗೆ..
ಅಪ್ಪುಗೆಯ ಬಹುಮಾನ
ಕೊಡಲೇನು ಆ ಜಡೆಗೆ…

ಅ….
ಅಯ್ಯೋ !! ಸಾಕು ಸಾಕು…

‪#‎ಕೆಂಡಸಂಪಿಗೆ‬
. . . . ಸಖ್ಯಮೇಧ

ಬಾನೆತ್ತರಕೆ ಬೆಳೆದು
ತಂಪು ನೆರಳನ್ನೀಯ್ವ
ಹೊಂಗೆ ವೃಕ್ಷದ ತರಹ
ಭರವಸೆಯ ಕಣ್ಣು…

. ಫಲಭರಿತ ಹೊಸದೊಂದು
. ಮರವೊಂದ ಕಂಡಾಗ
. ಹಕ್ಕಿಗಳು ನಕ್ಕಂತೆ
. ಬಳೆಯ ಸದ್ದು…

ಹಸಿರು ಗದ್ದೆಯ ನಡುವೆ
ಬೀಸುಗಾಳಿಯು ಹಾದು
ತೆನೆ ಬಳುಕಿ ನಕ್ಕಂತೆ
ಅವಳ ಮುಂಗುರುಳು…

. ಅತ್ತಿತ್ತ ಓಡಾಡಿ
. ಪೆದ್ದಾಗಿ ಕುಣಿಯುತಿಹ
. ಎಳೆಗರುವಿನಂತಹುದೇ
. ಮುಗ್ಧ ಮನಸು…

‪‎ಕೆಂಡಸಂಪಿಗೆ‬
. . . . . . ಸಖ್ಯಮೇಧ