ನಿರೀಕ್ಷೆ

(ಮದುವೆಯಾಗಿ ತಿಂಗಳುಗಳಾಗಿವೆ ಅಷ್ಟೇ, ಕೆಲಸಕ್ಕೆ ಹೋದ ಐತನ ಬರುವಿಕೆಗೆ ಪೀಂಚಲು ಗುಡಿಸಲಿನ ಬಾಗಿಲಲ್ಲಿ ಕಾದು, ಕನಸು ಕಾಣುತ್ತಾ ಕುಳಿತಿದ್ದಾಳೆ…)

ಸೋಗೆ ಹೊದೆಸಿದ ಮನೆಯೊಳಿಳಿದಿದೆ
ಚಂದಿರನ ಬೆಳದಿಂಗಳು
ಬಾಗಿಲಲಿ ಬರಕಾದು ಕುಳಿತಿವೆ
ಅವಳ ಚಂಚಲ ಕಂಗಳು

ಹುಣ್ಣಿವೆಯ ಚಂದಿರಗೆ ಲಘುಬಗೆ
ಹೊತ್ತು ಇಳಿಯುವ ಮುನ್ನವೇ
ರಾತ್ರಿಯೇರದೆ ಅವಳ ಮನಸಲಿ
ಇಷ್ಟು ಬಯಕೆಯು ಚೆನ್ನವೇ?!

ಗಂಡ ದಿನವಿಡಿ ದುಡಿದು ಬರುವನು
ಮಲ್ಲಿಗೆಯ ಹೂ ತರುವನು
ಹೂವ ಮಂಚದ ಮೇಲೆ ಇಡುವನು
ಕೆನ್ನೆ ಮೇಲ್ಗಡೆ ಮುತ್ತನು

ಸಪ್ಪೆ ಸಾರಿಗೆ ರುಚಿಯ ಸೇರಿಸಿ
ಹೊಗಳಿಕೆಯ ಮಳೆ ಸುರಿವನು
ಅವಳ ಕೈಗುಣ ಹೊಗಳೊ ನೆಪದಲಿ
ಕೈಗೆ ಕೈಯನು ಬೆಸೆವನು

ಊಟ ಮುಗಿಯಲು ಕವಳ ಹಾಕಲು
ತನ್ನನೂ ಜೊತೆ ಕರೆವನು
ಸ-ರಸ ವೀಳ್ಯವ ನಗುತ ಮೆಲ್ಲುತ
ತಮ್ಮ ಕೋಣೆಗೆ ಕರೆವನು

ದಿನವೂ ಪ್ರೇಮದ ಮಳೆಯ ಸುರಿವನು
ಪ್ರೀತಿಪರ್ವತರಾಜನು
ಇಂದು ಎಲ್ಲಿಗೆ ಹೋದ, ಇನ್ನೂ
ಎಷ್ಟು ಹೊತ್ತಿಗೆ ಬರುವನು?

ಅತ್ತ ಹೊರಗಡೆ ಕರುವು ಕೂಗಿತು
ನಲ್ಲ ಬರುತಿಹ ತುಡಿಯುತ
ಗೆಜ್ಜೆ ಕಾಲ್ಗಳ ಹೊತ್ತು ಬಂದಳು
ಒಳಗೊಳಗೆ ತುಟಿ ಕಡಿಯುತ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

Leave a Reply

Your email address will not be published. Required fields are marked *