Category: Uncategorized

ಘನಘನಿತ ಮೇಘ ಘೀಳಿಡುವ ಮಲೆಘಟ್ಟ
ಖಗಮೃಗಗಳ್ನಗುವಾಗ ಮುಗುಳಾಗೊ ಗಿರಿಬೆಟ್ಟ
ಕಲಕಲನೆ ಜಲಸೆಲೆಯು ಮೆಲುಹರಿವ ತಾಣ
ತರುಸಿರಿಯು ಮೆರೆವ ಕಿರಿದಿರುಳ ಹಿರಿದಾಣ

ಹಿಮಧಾರೆ ಹರಿಹರಿದು ಧರೆಪೂರ ಬಿಳಿಸೀರೆ
ರವಿರಾಯ ಗಿರಿಯೇರಿ ನಗೆಬೀರಿ ಮನಸೂರೆ
ಥಳಥಳನೆ ಹೊಳೆಯುತಿದೆ ಬಿಳಿಶಿಖರ ಬಿಸಿಲಿಗೆ
ತಿಳಿಗಾಳಿ ಬಳಿಸುಳಿದು ಕಚಗುಳಿಯು ದೇಹಕೆ
.

. . . . . ಕವನತನಯ ಸಖ್ಯಮೇಧ

ನೋವೊಂದು ನವೆಯಾಗಿ ನವಚಿಂತೆ ಬಲಿತಿರಲು
ನೆವವಿರದೆ ಮನನಾವೆ ನೀರಿನಲಿ ಮಗುಚಿರಲು-
ನವಿರಾಗಿ ಬಳಿಬಂದು “ನಾವಿರಲು ಹೆದರದಿರು”
ಎಂದವರೇ ದೇವರು, ಭುವಿಯಲ್ಲಿ ಸ್ನೇಹಿತರು !
.
ಓ ಸ್ನೇಹಿತ ! ನೀ ನನ್ನ ಹಿತ!
ಜೊತೆಯಲಿರು ಅನವರತ!

ಪ್ರತಿಮಂದಿ ಊರಲ್ಲಿ ಆಡಿಕೊಂಬರು
ಸಂಜೆ-
ಕೆಳಮನೆಯ ಸೀತವ್ವ ಎಂಬುವಳು ಬಂಜೆ!
ಹರಕೆ, ಹಾರೈಕೆಗಳಿಗಾಗಿಲ್ಲ ಕೂಸು,
ಆಲೈಸುವವರಾರು ಅವಳೊಡಲ ತ್ರಾಸು?!
.
ಆ ದಿನದ ಸುದ್ದಿಯದು-ಸೀತವ್ವ ಬಸುರಿ!
ಊರೊಳಗೆ ಹರಡಿತ್ತು, ಪ್ರತಿ ಕಿವಿಯಲುಸುರಿ!
ಅವರ ಲೆಕ್ಕದಲೀಗ ಕಣ್ದೆರೆದ ದೇವರು!
ಸೀತವ್ವ ನೆಲದ ಮೇಲಿಲ್ಲವೆಂದೆಂಬರು!
.
ಸೀತವ್ವನಿಗೆ ಹಿಗ್ಗು; ಬೆಳೆವ ಹೊಟ್ಟೆಯ
ಕಂಡು!
ಅವಳ ಸೇವೆಗೆ ಈಗ ಊರ ಜನರಾ ಹಿಂಡು!
ಸಿಹಿ ಹುಣಿಸೆ, ಹುಳಿ ಮಾವು, ವಿವಿಧ ಸಿಹಿತಿನಿಸು..
ಅವಳ ಹೊಟ್ಟೆಯಲಿರುವ ಮಗುವಿನದೇ ಕನಸು..
.
ಸೀಮಂತ ಬಂತು ಬಿಡಿ, ಊರಿಗೇ ಪಾಯಸ!
ಆ ಸೊಬಗ ನೋಡುವುದೇ ಕಣ್ಣುಗಳ ಕೆಲಸ!
ಆರತಿಯು ಸಾಕು ಬಿಡಿ, ಉಷ್ಣವಾದೀತು!
ಕಲಶಜಲ ಸೋಕದಿರಿ, ಥಂಡಿಯಾದೀತು!
.
ಸೀತವ್ವ ನಡೆವುದು ಬೇಡ, ಸುಸ್ತು ಬಡಿವುದು ಕೂಸು!
ತುಂಬು ಬಸುರಿಯು ಅವಳು, ಬೇಗ ಕಂಬಳಿ ಹಾಸು!
ಹತ್ತು ವರ್ಷದ ಹರಕೆ ಕೈಗೂಡುತಿದೆ ಈಗ,
ಒಳಗಿಂದ ಗಂಡುಮಗು ಹೊರಗೆ ಬರಲೀ
ಬೇಗ!
.
ಹೋಳಿಗೆಗೆ ಹದ ಹಾಕಿ, ಸೀತವ್ವನಿಗೆ ಬೇನೆ!
ಹೊಸಜೀವದಾಸೆಯಲಿ ನಗುತಿಹುದು ‘ಕೆಳಮನೆ’!
ಸುದ್ದಿ ತಂದರು ಯಾರೋ- “ಒಳಗೆಲ್ಲ ನೀರಂತೆ!”
“ಗರ್ಭ ತುಂಬಿದ ನೀರು ಹರಿದು ಹೋಯ್ತಂತೆ!”
. . . . ಕವನತನಯ ಸಖ್ಯಮೇಧ

ಕಡಲದಡದಲಿ ಎಡೆಬಿಡದ ಮೊರೆತ,
ಮೋಡದೊಡಲಲಿ ಕಡುಗುಡುಗಿನ ಕೆನೆತ,
ಕಾಡಡವಿಯಲಿ ಕೂಡುವಾ ಹಕ್ಕಿಜೋಡಿಯ ಉಲಿತ,
ಸುಡುಗಾಡಲಿ ಬಾಡುತಿಹ ಕುಡಿಹುಲ್ಲಿನ ನೆನೆತ-
ನಿನ್ನ ಲಾಲಿಗೆ ಪಲ್ಲವಿ! ಗುರುವೇ!,
ನಿನ್ನ ಕಾಲಿಗೆ ಸಲ್ಲಲಿ!
.
ಮಕರಂದ, ಮಧುಬಿಂದು, ಸಿಹಿನೀರ
ತೊರೆ ಸಿಂಧು,
ಬಿರಿದಿರುವ ಕಸ್ತೂರಿ, ಗಿಳಿಕೊರಳ ತುತ್ತೂರಿ,
ಜಾವದಲಿ ಅವತರಿತ ಹೂವಿನಾ ಸವಿಭಾವ
ನಿನ್ನ ಕಣ್ಣಲೇ ಮುಳುಗಿ ಉದಯಿಸುವ ಚಂದ್ರ!-
ನಿನ್ನ ಹೆಸರಿಗೆ ಅರ್ಪಿತ! ಗುರುವೇ!,
ನಿನ್ನ ಹೆಸರದು ಶಾಶ್ವತ!
.
ಹೊಂಬಿಸಿಲು, ಬಾಂದಳದ ಸಿಂಧೂರ ನಿನಗಾಗಿ,
ಕುಡಿದೀಪ, ನಿಡಿಬಿಸಿಲು, ಸಿಡಿಲಬಳ್ಳಿಯು ಬೆಳಗಿ,
ವಿಶ್ವ ನಿನ್ನೊಳಗಿಹುದು, ನನ್ನೊಳಗೆ
ನೀನು!
ಸಿರಿಸಾರ, ಪರಿಹಾರ, ಮನಮೂರ್ತಿ! ಕೇಳು!
ನೀ ಜಗದ ಗಾನ! ಗುರುವೇ!,
ಒಳಮನದ ಮೌನ!
(‘ಗೀತಾಂಜಲಿ‘ ಯ ‘ವಾತ್ಸಲ್ಯ’ ಗೀತೆ
ಓದಿದಾಗ ಅನಿಸಿದ್ದು,)
. . . . ಕವನತನಯ ಸಖ್ಯಮೇಧ