ಇದು ಭಾವಾಲಾಪಗಳ ಸುರಿಮಳೆ
ಕ ದಪುಗಳು ಕೆಂಪೇರಿ ನೀ ನಾಚಿ ನಗುವಾಗ
ಕಾ ಲಲ್ಲೇ ನಿಂತಲ್ಲೇ ರಂಗೋಲಿ ಬರೆವಾಗ
ಕಿ ರಿದಾದ ನಗುವೊಂದು ಕಣ್ಣಲ್ಲಿ ಕಂಡಾಗ
ಕೀ ಲಿಕೈ ನೀನಾದೆ ಪ್ರೀತಿ ಬಾಗಿಲಿಗೆ….
ಕು ಶಲತೆಯ ಆ ಮಾತು, ಕೇಳುವಿಕೆಗಿಂಪು..
ಕೂ ತಲ್ಲಿ ನಂತಲ್ಲಿ ನಿನ್ನದೇ ನೆನಪು…!
ಕೆ ತ್ತಿಹೆನು ಎದೆಯಲ್ಲಿ ನಿನ್ನ ಹೆಸರನ್ನು ..
ಕೇ ಳಿಲ್ಲಿ ಒಂದುಕ್ಷಣ ಎದೆಬಡಿತವನ್ನು…
ಕೈ ಗೂಸಿನಂತೆಣಿಸಿ ಪ್ರೀತಿಸುವೆನು…
ಕೊ ರಗು ಕರಗಿಸು,
ಪ್ರೀತಿಸೌಧವನು ನೀ ಕಟ್ಟು
ಕೋ ರಿಕೆಯ ಒಪ್ಪಿ ಬಂದಪ್ಪಿ ಸಂತೈಸು…
ಕೌ ತುಕವ ಬದಿಗಟ್ಟಿ ಪ್ರೀತಿ ಸಾಲವ ನೀಡು
ಕಂತುಕಂತುಗಳಲ್ಲಿ ತೀರಿಸುವೆ-ಮುತ್ತುಗಳ..!!
ಕಹಿಬದುಕ ಸಿಹಿಗೊಳಿಸು, ಬಂದುಬಿಡು ನೀ…
. . . . . . ಸಖ್ಯಮೇಧ
ಬಾಹುಬಂಧನ – ಅದುವೆ – ಭಾವಬಂಧನ!!
ತನುವ ಮಂಥನ-ಮನವು- ನಂದನವನ..!
ಮನದ ಮಿಲನ-ಚಂದ – ಮಂತ್ರಸಮ್ಮೋಹನ..
ನಿನ್ನ ಮನನ- ಹೊಸತು ಭಾವ ಜನನ…!!
. . . . . . ಸಖ್ಯಮೇಧ
ಭಾವಾಮೃತವೇ….,
ಚಂದದಾ ಹಣೆಮೇಲೆ ದುಂಡುಬಿಂದಿಯನಿಟ್ಟು
ಕಣ್ಣಲ್ಲೇ ನೀ ನಾಟ್ಯವಾಡುವಾಗ..
ಮುದ್ದುಕ್ಕಿ ಬಂದಿತ್ತು ಭಾವಬಿಂದಿಗೆ ತುಂಬಿ-
ವಾತ್ಸಲ್ಯದಾ ಪ್ರಸವ – ಮನ ಬೀಗಿದಾಗ..!
.
ಪುಟ್ಟಮೂಗಿನ ಮೇಲೆ
ಪಟ್ಟದಾ ಮೂಗುತಿ..
ಪಟ್ಟಕದ ರೀತಿಯಲಿ ಹೊಳೆಯುವಾಗ..
ತುಟ್ಟಿಯಾಯಿತು ಪ್ರೀತಿ; ಕಣ್ಕಟ್ಟಿತೂ ಬೆಳಕು
ಎದೆತಟ್ಟಿ ಒಲವ ಮನೆ ಕಟ್ಟುವಾಗ…!
.
ಅಡಗಿ ಕುಳಿತಿಹ ಕಿವಿಯ
ಬೆಡಗ ಬಣ್ಣಿಸಲೆಂದು
ಮಡಗಿದಾ ಒಡವೆಯಿದು ಕಿವಿಯೋಲೆ ಕಾಣು..!
ಬಿಡುವು ಆದಾಗೆಲ್ಲ ಕೈಯಿಡುತ ಮುಂಗುರುಳ
ಸಡಿಸುತಲಿ ಕಿವಿ ಮೇಲೆ ಇಡುತಲಿರು ನೀ..!
.
ಮಲ್ಲಿಗೆಯ ಹೊತ್ತು ತಾ ಚೆಲ್ಲಾಟವಾಡುತಿಹ
ಜಡೆಯ ಪಲ್ಲಟ ನಿಮಿಷನಿಮಿಷಕೊಮ್ಮೆ..!
ಗಲ್ಲದಾ ಬೊಟ್ಟಿಗೂ ಇಲ್ಲಿರುವ ಕೂದಲಿಗೂ
ಸಲ್ಲುತಿದೆ ಅಚ್ಚು ಕಲ್ಗಪ್ಪು ಬಣ್ಣ..!
….
ಲಜ್ಜೆಗೆಂಪಿನ ಹಿಮ್ಮಡದ
ಮೇಲ್ಜೋತುಬಿದ್ದಿಹ ಗೆಜ್ಜೆಯು..!
ಮುಚ್ಚುಮರೆಯಲಿ ಹುಚ್ಚು ಹಿಡಿಸಿದೆ
ಇಚ್ಛೆ ಹೆಚ್ಚಿದೆ ಮನದಲಿ..!
.
ಕೆಂಡಸಂಪಿಗೆ …
. . . . . . ಸಖ್ಯಮೇಧ
ಅ ನುದಿನವೂ ಹಳೆ ನೆನಪು
ಆ ಕರ್ಷಣೆಯ ಹೊಳಪು
ಇ ರುಳಲ್ಲೂ ನಿನ್ನ ನೆನೆವ
ಈ ಪರಿಯ ಹೊಸ ಹುರುಪು
ಉ ಸಿರಲ್ಲೂ ನಿನ್ನತನ
ಊ ನವಾಗಿಹುದು ಮನ
ಎ ಲ್ಲಿ ದೂರಾಗಿರುವೆ
ಏ ತಕ್ಕೆ ಅಡಗಿರುವೆ
ಐ ಕ್ಯವಾಗುವ ಬೇಗ ಬಂದುಬಿಡು ನೀ…
ಒ ಮ್ಮೆ ನೀ ಬಾ ಸನಿಹ
ಓ ಡಿಸುತ ಈ ವಿರಹ
ಔ ಪಾಸಿಸಿಹೆ ನಿನ್ನ ಹೆಸರ ಅನವರತ…
ಅಂತರಾತ್ಮವು ನಿನ್ನ ಬರಕಾಯುತಿಹುದು…
ಅಹುದು ಆಗಲಿ ಎಂದು ಬಂದುಬಿಡು ನೀ…
.
ಕೆಂಡಸಂಪಿಗೆ
. . . . . . . . ಸಖ್ಯಮೇಧ
ಗೆಳತೀ …,
ನೀನಿರದಿರೆ….
ಖುಷಿನೀಡದು ಶಶಿಯುಷೆಯೂ
ತೃಷೆನೀಗದು ಪೀಯೂಷವೂ
ನಶೆಯೇರದು ನಿಶೆಯಲ್ಲೂ
ದಿಶೆತಪ್ಪಿದೆ ಆಶೆಯದು…
.
ವಶವಾಗಿಹೆ ಕುಶಲತೆಗೆ
ಸುಷ್ಮಸುಮಸಮಾಕರ್ಷಣೆಗೆ…
ಕೃಶವಾಗಿಹೆ ಮನಸೋತಿಹೆ
ಹೊಸಭಾವದ ಘರ್ಷಣೆಗೆ…!
ಕೆಂಡಸಂಪಿಗೆ
ಶಿಶಿರ
. . . . . . . ಸಖ್ಯಮೇಧ
ಮಂಜಿನೋಕುಳಿ ನಡುವೆ
ತೊಯ್ದಿರುವ ಗರಿಕೆಯಾ-
ಮೇಲಿರುವ ಇಬ್ಬನಿಯು
ಅವಳ ಕಣ್ಣಂತೆ…!
ಬೀಸುಗಾಳಿಗೆ ಕೊಂಚ-
ಕೊಂಚವೇ ಬಳುಕುವಾ
ಹೊಂಬಾಳೆ ಬಿರಿದಂತೆ
ಅವಳ ನಗುವು…!
ಕಲ್ಪವೃಕ್ಷದ ಮೇಲೆ
ಇಬ್ಬನಿಯು ಒಂದಾಗಿ
ಹನಿಯು ಕೆಳಗಿಳಿವಂತೆ
ಅವಳ ಮಾತು…!
. . . . . ಸಖ್ಯಮೇಧ
ಮನದ ಬಾನಲ್ಲಿ ನೀ ನಲಿವ ನಕ್ಷತ್ರ…
ಕನಸ ಗೋಡೆಯ ತುಂಬ ನಿನ್ನದೇ ಸುಚಿತ್ರ…
ಅನುನಯದಿ ಒಲವಾದೆ ನೀ ಕೆಂಡಸಂಪಿಗೆ …
ಎದೆಯ ಬೀದಿಯ ತುಂಬ
ನಿನ್ನದೇ ಮೆರವಣಿಗೆ …
.
ನಿನ್ನ ಮನನದಿ ನನ್ನತನವಿನ್ನು ಗೌಣ…
ನಿನ್ನ ನಗುವಲಿ ನನ್ನ ತ್ರಾಣವೂ ಲೀನ…
ನಿನ್ನ ನೆನಪಲಿ ಮನವು ಅನುದಿನವೂ ತಲ್ಲೀನ…
ನಿನ್ನ ಮಿಲನದಿ ನನ್ನ ಜನ್ಮವೂ ಧನ್ಯ…
. . . . . ಸಖ್ಯಮೇಧ
ಒಳಗೊಳಗೇ ಕಳವಳವು
ತಿಳಿಗೊಳದಿ ಅಲೆಯಲೆಯು
ಎಳೆಬಿಸಿಲ ಝಳಕಕ್ಕೆ
ಸುಡುಬಿಸಿಲ ಬಳುವಳಿಯು
ತಿಳುವಳಿಕೆ ಮನಕಿಲ್ಲ
ತಳಮಳಕೆ ಕೊನೆಯಿಲ್ಲ
ಕೊಳೆಕೊಳೆತು ನಾರುತಿವೆ
ಅಳಿದುಳಿದ ನೆನಪುಗಳೂ
ಕಳೆಕೊಳೆಗಳೆದೆಯಲ್ಲಿ
ಬೆಳೆಬೆಳೆದು ನಿಂತಿವೆ…
ಭಾವಕ್ಕಿಲ್ಲ_ಬೆಲೆ
. . . . . ಸಖ್ಯಮೇಧ
ನೀ ಕದ್ದು ಮಾತಾಡು, ಮುದ್ದಾದ ಪದ ಹೇಳು
ಮನ ಎದ್ದು ಕುಣಿವಂತೆ ಉದ್ದುದ್ದ ಕತೆ ಹೇಳು,
ಆಗಾಗ ಪೆದ್ದಾಗಿ ಬಿದ್ದ ಕನಸನು ಹೇಳು,
ಖುದ್ದಾಗಿ ಬಂದುಬಿಡು, ಬಿದ್ದಿರುವೆ ಪ್ರೀತಿಯಲಿ….
ಕೆಂಡಸಂಪಿಗೆ
. . . . . . . . ಸಖ್ಯಮೇಧ