ನಕ್ಷತ್ರ

ನಿಜ ಹೇಳು ಗೆಳತೀ…,
.
ಏಲಿಯನ್ನುಗಳು ಬಂದಿದ್ದವಲ್ಲವೇ….?!
.
ನಿನ್ನ ಕಂಗಳಲ್ಲಿ ನಕ್ಷತ್ರವಿಟ್ಟು ಹೋಗಲು….!?
# ಸುಮ್ಮನೇ
. . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಹೂರಾಣಿ

ಹೂಗಳ ಸಂತೆಯಲ್ಲಿ …
ಮಲ್ಲಿಗೆಯ ಪರಿಮಳಕೆ ಎಲ್ಲರಿಗೂ ಉನ್ಮಾದ…
ಕೇದಿಗೆಯು ಬಂದಾಗ ಜೊತೆಗೆ ಉದ್ವೇಗ..!
ಜಾಜಿಯದೂ ಸೋಜಿಗ..! ಸರಿಸಾಟಿ ಯಾರೀಗ..?! –
ಕೆಂಡಸಂಪಿಗೆ ಬಂದಾಗ – ಬದಿಗೆ
ಸರಿದವು ಬೇಗ…!
.
ತನ್ನ ಕಂಪಿನ ಗಾಢತೆಗೆ
ಅಮಲೇರಿದಂತಾಗಿ
ಇನ್ನಷ್ಟು ಕೆಂಪೇರಿ-
-ದಳು ಕೆಂಡಸಂಪೀ….
. . . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಹುಡುಗಿ

ಮುದ್ದುಗಲ್ಲದ ಹುಡುಗಿ..! ಇನ್ನೊಮ್ಮೆ ನಾಚು….
ನೋಟದಲಿ ನಾಚಿಕೆಯ ಕೊಂಚ ಮರೆಮಾಚು…
ಮುಗುಳುನಗೆಯಾ ಸೂಸು, ಕೆಂಪೇರಲಿ ಕೆನ್ನೆ…
ನಿನ್ನ ನೋಡುತ ಮರೆವೆ ಪೂರ್ತಿ ಜಗವನ್ನೆ…!
.
ಹೊನ್ನಬಣ್ಣದಿ ಮಿಂದೆದ್ದು
ಬಂದವಳು ಇವಳು…
ಕೆಂಡಸಂಪಿಗೆ ತರದಿ
ನಳನಳಿಸುತಿಹಳು…
.
ಕೆಂಡಸಂಪಿಗೆಯಂಥವಳು …!
. . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಕೆನ್ನೆ

ಗೆಳತೀ….,
ಮಾತುಮಾತಿಗೆ ನೀನು ನಾಚಿ ನೀರಾಗುತಿರೆ
ಬಣ್ಣದೋಕುಳಿ ನಿನ್ನ ಕೆನ್ನೆ ತುಂಬಾ !
ನೀ ನಕ್ಕು ಕೆನ್ನೆ ಕೆಂಪೇರುತಿರೆ- ಅರಳುವುದು-
ಕೆಂಡಸಂಪಿಗೆ ಹೂವು ಕೆನ್ನೆ ಮೇಲೆ..!!
.
ನಕ್ಕು ಬಿಡು, ನಾಚಿ ಬಿಡು-
ಕೆಂಪೇರಲಿ ಗಲ್ಲ;
ಕದ್ದುಬಿಡು, ದೋಚಿಬಿಡು-
ಭುವಿಯ ಬಣ್ಣವನೆಲ್ಲ…!!
.
# ಅಪ್ಪಟ_ಕೆಂಡಸಂಪಿಗೆಯಂಥವಳು …!!
. . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಸಂತೆ

ಗೆಳತೀ ….
.
ಈ ಹಾಳು
ನೆನಪುಗಳನ್ನು
ಗುಜರಿಗೆ ಹಾಕಿ
ಕೊಂಚ ಪ್ರೀತಿಯನ್ನು
ಕೊಳ್ಳಬೇಕಿದೆ….
.
ಹೇಳು… ಎಲ್ಲಿದೆ ಸಂತೆ….?!
. . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಕನಸು

ಗೆಳತೀ ….
ಕನಸುಗಳಿಗೆ
ಕಣ್ಣೇ ದಾರಿಯೆಂದು
ಮುಚ್ಚಿದೆ ಕಂಗಳನ್ನು….
ಇನ್ನಷ್ಟು ಕಾಡಿದವು ನಿನ್ನ ನೆನಪುಗಳು…!!
ಜೊತೆಗೆ ಕನಸುಗಳೂ….
.
ಹೇಳು ಈಗ…
ಹೇಗೆ ಮುಚ್ಚಲಿ ಮನದ ಬಾಗಿಲ…?!
. . . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಹೊರ ನೋಟ

ಮಧುವ ಹೀರಿದ ದುಂಬಿ ತಾ
ಧನ್ಯತೆಯಿಂ ನಮಿಸುತಿರೆ
ಮಧು ನೀಡಿದ ಹೂವಿಗೋ
ಭಾವಪ್ರಾಪ್ತಿ..!!
.
ಮುಂಜಾನೆ ನಡೆದಿತ್ತು
ಇಬ್ಬನಿಯ ಜೊತೆ ಸರಸ
ಮಧ್ಯಾಹ್ನ ಗಿಡದುಂಬಿ
ಹೂವು ಅರಳಿತ್ತು..!!
.
ಮಳಗಾಲದಾ ತುಂಬ
ಜೊತೆಗಿದ್ದ ಮೋಡಗಳು
ದೂರವಾದೊಡೆ ರವಿಗೆ
ವಿರಹಬಾಧೆ..!!
.
ಕಡಲ ನೀರನಿಗಳಿಗೆ
ಕಾವೇರಿ ಮೇಲೇರಿ
ರವಿಯನ್ನು ಚುಂಬಿಸುವ
ಆಕರ್ಷಣೆ..!!
.
ಹರಿಬಂದ ನದಿಯನ್ನು
ಒಡಲೊಳಗೆ ಕಾಪಿಟ್ಟು
ಮಮತೆಯನು ತೋರಿತ್ತು
ಮಲತಾಯಿ- ಶರಧಿ..!!
.
ಮಳೆಗೆ ಅರಳಿದೆ ಭೂಮಿ
ಇಳೆತುಂಬ “ಹಸಿರು”
ತನ್ನ “ಮಕ್ಕಳ” ಕಂಡು
ಸುಖಿಸಿತ್ತು ಮೋಡ..!!
.
ನಿಂತಿದ್ದ ಹುಲ್ಲುಗಳ
ನಲುಗಿಸಿತು ಗಾಳಿ..
ಚುಂಬನವೋ ಅಪ್ಪುಗೆಯೋ
ಅವಕೂ ತಿಳಿಯಲಿಲ್ಲ..!!
.
ಬಿದಿರ ಮೆಳೆಗಳ ನಡುವೆ
ತೀಡುವಾ ಶಬ್ಧ..
ತನ್ನದೇ ಸಂಗೀತಕೆ ಬಿದಿರು
ತಲೆದೂಗುತಿತ್ತು..!!
. . . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಮುತ್ತು

ಅವಳು ಪ್ರತಿಬಾರಿ ನಕ್ಕಾಗಲೂ
ಬೀಳುತ್ತಿದ್ದ ಮುತ್ತುಗಳನ್ನು
ಆಯ್ದು ಎದೆಯೊಳಗೆ ಬಚ್ಚಿಡುತ್ತಿದ್ದೆ…
ಇಂದು ಎದೆಗೂಡನ್ನು ಎಷ್ಟೇ
ತಡಕಾಡಿದರೂ….
ನೆನಪುಗಳಷ್ಟೇ ಸಿಕ್ಕಿವೆ…
ಮುತ್ತೂ ಇಲ್ಲ.. ನಗುವೂ ಇಲ್ಲ..
. . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು:

ಅವಳು ಕೆಂಡಸಂಪಿಗೆ

ಕೆಂಡಸಂಪಿಗೆ ಕೊಯ್ದು
ಘಮದ ಹೂಗಳ ಆಯ್ದು
ಪಕಳೆಗಳ ತೇಯ್ದು
ಜಿನುಗೋ ನೀರನು ತೆಗೆದು
ಕೆಂಪು ಗಂಧವನುಳಿದು
ಕೊಂಚ ಚಂದನ ಬಳಿದು
ಜೊತೆಗೆ ಕೇಸರಿ ಅಳೆದು
ಬರುವ ಗಂಧದ ಹಿಟ್ಟಿನಲಿ
ಗೊಂಬೆಯೊಂದನು ಮಾಡೆ-
ಅವಳ ಬಣ್ಣವೇ ಬಂದಿತ್ತು..!
ಅವಳುಸಿರ ಘಮವಿತ್ತು!
.
ಕೆಂಡಸಂಪಿಗೆಯಂಥವಳು ..!
. . . . . . . ಸಖ್ಯಮೇಧ

ಈ ಪೋಸ್ಟ್ ಅನ್ನು ಶೇರ್ ಮಾಡಲು: