ಗೋವಾದ ಖ್ಯಾತ ದೇವಳಗಳಲ್ಲಿ ಒಂದು ಚಂದ್ರೇಶ್ವರ ಭೂತನಾಥ ಮಂದಿರ. ಇಲ್ಲಿನವರ ಬಾಯಲ್ಲಿ ಇದು “ಪರ್ವತ”. ಬೃಹತ್ ಬೆಟ್ಟವೊಂದರ ತುದಿಯಲ್ಲಿ ಇರುವ ಈ ಮಂದಿರದ ಬಳಿಯಿಂದ ಸುತ್ತಮುತ್ತಲಿನ ದೂರದವರೆಗಿನ ಪ್ರದೇಶದ ಪಕ್ಷಿನೋಟ ಕಣ್ಸೆಳೆಯುತ್ತದೆ. ಮಳೆಗಾಲದಲ್ಲಿ ಭೇಟಿ ಕೊಡಲು ಇದು ಪ್ರಶಸ್ತ ಜಾಗ.
![Chandreshwar Bhootnath Temple, Goa](https://kendasampige.in/wp-content/uploads/2017/05/unnamed-1-300x225.jpg)
![A view from chandreshwar Bhootnath Temple, goa](https://kendasampige.in/wp-content/uploads/2017/05/IMG_20170514_173923.jpg)
ಪರ್ವತದ ಬಹುತೇಕ ತುದಿಯವರೆಗೂ ವಾಹನ ಒಯ್ಯಬಹುದು. ಆದರೆ ವಾಹನ ಚಲಾಯಿಸುವಾಗ ತುಂಬಾ ಎಚ್ಚರಿಕೆ ಅವಶ್ಯ. ಕಿರಿದಾದ ರಸ್ತೆಯ ಮೈ ಪೂರ್ತಿ ಘಟ್ಟ ಮತ್ತು ತಿರುವುಗಳೇ ತುಂಬಿವೆ. ದೇವಸ್ಥಾನಗಳಲ್ಲಿ ಫೋಟೋ ತೆಗೆಯುವುದು ನಿಷಿದ್ಧವಾದ್ದರಿಂದ ಒಳ ಆವರಣದ ಫೋಟೋಗಳು ಇಲ್ಲ.
ಅಂತಹ ಬೆಟ್ಟದ ತುದಿಯಲ್ಲೂ ಇಷ್ಟೊಂದು ವ್ಯವಸ್ಥಿತವಾಗಿ ದೇವಸ್ಥಾನ ಕಟ್ಟಿರುವ ಮಾನವ ಪ್ರಯತ್ನ ಸಣ್ಣದಲ್ಲ. ಅದಕ್ಕಿಂತ ಹೆಚ್ಚಾಗಿ ಅಲ್ಲೇ ಸ್ವಲ್ಪ ದೂರದಲ್ಲಿ ಒಂದು ಮೊಬೈಲ್ ಟವರ್ ಕಟ್ಟಿದ್ದಾರೆ. ಅದರ ಎತ್ತರ ಕಂಡು ಎಂಥವರೂ ಬೆರಗಾಗಬೇಕು. ಮಂದಿರದ ಬಳಿ ನಿಂತು ನೋಡಿದರೆ ಆ ಎತ್ತರದ ಟವರ್ ಬೃಹದಾಗಿ ಕಾಣುತ್ತಿದ್ದರೆ ಅದರ ಬುಡದಿ ನಿಂತ ಮನುಷ್ಯರು ಇರುವೆಗಿಂತ ಚಿಕ್ಕದಾಗಿ ಕಾಣುತ್ತಿದ್ದರು.
ದೇವಸ್ಥಾನದ ಮೆಟ್ಟಿಲ ಬಳಿ ಒಬ್ಬಾತ ಲಿಂಬು ಸೋಡಾ ಮಾರುತ್ತಾನೆ. ಒಂದು ಗ್ಲಾಸ್ ಹದವಾಗಿ ಬೆರೆಸಿದ ನಿಂಬು ಸೋಡಾ ಕುಡಿದರೆ ಸುತ್ತಾಡಿದ ಆಯಾಸವೆಲ್ಲ ಬಹುದೂರ.
![Kavanatanaya vishwanath gaonkar ಕವನತನಯ](https://kendasampige.in/wp-content/uploads/2017/05/IMG_20170514_191228.jpg)
ಮಡಗಾಂವ್ ದಿಂದ ಇಲ್ಲಿಗೆ ಹೋಗಲು ನಲವತ್ತು ನಿಮಿಷ ಸರಾಸರಿ ಬೇಕು. airport ನಿಂದ ಕನಿಷ್ಠ ಒಂದೂವರೆ ತಾಸು. ಮಡಗಾಂವ್ ದಿಂದ quepem (ಕೆಪೆ)ಗೆ ಹೋಗುವ ದಾರಿಯ ಮಧ್ಯದಲ್ಲಿ ದೊಡ್ಡ ಕಮಾನು ಎದುರಾಗುತ್ತದೆ. ಅಲ್ಲಿಂದ ಬೆಟ್ಟದ ದಾರಿಯಲ್ಲಿ ಸಾಗಬೇಕು.
ಗೋವಾಕ್ಕೆ ಭೇಟಿ ಇತ್ತಾಗ ನೋಡಲೇ ಬೇಕಾದ ಸ್ಥಳಗಳಲ್ಲಿ ಇದೂ ಒಂದು.ಹತ್ತಿರದಲ್ಲಿ ಕುರ್ತರಿ ಮಹಾಮಾಯೆ, ಜಾಂಬಾವಲಿ ಮುಂತಾದ ನೋಡಬಹುದಾದ ಸ್ಥಳಗಳಿವೆ.